Hageåret 2024 – juli til desember

Andre halvdel av 2024 starta med ferie rundt i Norge, og hagen måtte klare seg litt sjølv. Men eg klarar ikkje å halde meg altfor lenge unna hagen når det er høgsesong, så eg var mykje heime òg.

Juli

Georginene i skråninga mellom staudehagen og kjøkkenhagen starta bløminga i juni, men det store effekten kom først seinare på sommaren. Desse to bileta viser to nye sortar eg skaffa meg denne sesongen. Til venstre ser du «Verrone´s Obsidian» og til høgre er «Sweet Suzanne». Sweet Suzanne er ein av mine nye favorittar trur eg.

17. juli hausta eg kvitløken som først kom i jorda i februar. Det vart den hittil beste kvitløkshausten eg har hatt, så det går visst fint å vera seint ute med å sette den. Og det er ein viss fare for at det samme har skjedd i år…

Fargane på blomane i staudehagen i slutten av juli går meir i lysare blå- og rosafargar. Dei fleste staudene her blømer tidlegare på sommaren. Den store hagehortensiaen til venstre er flott, men eg syns fargen er noko krevande siden den tar så stor oppmerksomhet, og planta er veldig stor. Over ser du og den ferdige pergolaen med nye hagemøbler. Desse er eg veldig nøgd med. Eg leita ei stund før eg fant noko eg ville ha, då eg har ein del krav til hagemøbler; dei skal vera fine, gode å sitte i uten puter, lette å tørke av og tåle å stå ute heile året uten å bli stygge.

Over ser du nokre bilder frå vestsida av huset der eg har eit nyare anlagt bed. Dette bedet har i hovudsak stauder kjøpt som barrot, og største del av bedet vart anlagt våren 2023. Fargetemaet i dette bedet er «solnedgong», og her har eg raude, oransje og knall gule fargar som eg ikke har i staudehagen ved pergolaen, i tillegg til ulike nyanser av lilla og rosa. Her legg eg òg vekt på planter som har fine former gjennom vinteren siden dette bedet er langs innkjørsla og eg ser det heile året. Blomstringa her er finast seinsommar og haust.

August

Her er nokre glimt frå kjøkkenhagen 7. august. Eg brukte mindre tid her dette året enn tidlegare, men eg fekk ein god haust av squash, sukkererter, asparges, grønnkål, bladbete og luftløk.

Eg syns det er fint med sittegruppa eg har plassert her, men eg innser at eg ikkje brukar å sette meg ned her, så det er godt mulig at møblene finn ein ny plass i sommar.

I den terrasserte skråninga over kjøkkenhagen har eg sommarblomar nedst og georginer øvst. Favoritten min av sommarblomar, pyntekorg, med Cosmos ´Apricotta´ heilt på toppen av pallen (øvst i det midtre bildet over og det midtre nederst bildet under), har eg alltid ein del planter av.

Før har eg hatt dei fleste georginene i potter, men i fjor enda eg opp med så mange knollar at eg fant ut eg måtte prøve noko nytt. Det fungerte veldig bra å ha dei her i skråninga, og eg var overraska over kor lite snegleangrep det var. Det var bare eit par svakare planter som vart tydeleg spist på.

Eg kjøpte meg ei lyslenke med solcellepanel til pergolaen, og på seinsommaren lyser den fint opp på kveldane.

I slutten av august hausta eg poteter og plommehausten kom i gong. Det var masse plommer denne sommaren!

September

Sesongens største bukett frå hagen laga eg til me skulle ha foredrag med Tommy Tønsberg i Kvinnherad hagelag. Eg er med i styret der, og me pynta lokalet med blomar frå hagane våre. Denne buketten skulle få stå på scena, og måtte vise igjen. Det var kjekt å bruke den store tallerkengeorgina «Break Out» i ein bukett. Den er vanskelig å bruke i ein «vanleg» bukett siden den er så stor.

Oktober

Desse bilda er tatt 5. oktober, og det er fint med blomar som blomstrar seint, men sommarsolhatt (her sorten ´Sahara´ trur eg) er ikkje den eg har best erfaring med, då det blir lite planter sjølv om eg sår mange frø. Desse plantene overvintra faktisk frå 2023-sesongen, og blomstra finare den andre sesongen.

På veg heim frå jobb 22. oktober dukka det opp to regnbogar på himmelen og eg skunda meg heim i håp om å få tatt bilde av dei frå hagen. Dette bildet viser at staudehagen er nokså fin sjølv om alle staudene er avblomstra, med unntak av ein stjerneskjerm nede til høgre som er i gong med andre blomstring.

November

Bildet over er tatt like før klokka fire på ettermiddagen 19. november. Eg er så heldig med den nydelige utsikten min! Her ser du at eg har tatt opp georginene frå skråninga til venstre. Dei kunne stått til godt ut i november, men det er greit å velge nokre dagar med fint og tørt ver for å grave dei opp, så det skjedde i slutten av oktober.

Den første snøen kom 22. november, og staudene langs innkjørsla er fine med snøhattar.

Desember

8. desember varma sola sånn at eg kunne sitte litt i pergolaen og nyte hagen.

Eg er takknemlig for at me har vinter, og det er godt med ein pause frå hagen siden eg legg ned veldig mykje energi der i løpet av ein sesong. Men no når me er inne i februar kjenner eg meg ferdig med kulde og mørke, og har lyst til å starte opp igjen med hageprosjekt!