Tilbakeblikk på 2023-hagen

No seier kalenderen januar 2024, og eg har sidan nyttår posta eit par «reels» på instagramkontoen @hildesinhage med glimt frå hagesesongen som var, og tenker det hadde vore kjekt å få ned kva eg gjorde i hagen i fjor, og korleis den såg ut på bloggen òg. Så her er ein svært lang bloggpost som dekker heile hageåret 2023 i hagen min her ytterst i Hardangerfjorden.

Eg starta å tenke på hagen i romjula då eg satt på nett og såg på kva frø eg skulle bestille, og dei første frøa dumpa ned i postkassen i januar. Fargetemaet på nye sommarblomfrø for året vart bleik gult, fersken, rosa og mørk raudt. Eg hadde òg eit godt lager med frø frå tidlegare år som eg sådde utover våren.

Hagen i januar er som regel eit trist syn, noko dei to bileta under viser godt.

Status plattingen i staudehagen, januar 2023

Dei første snøklokkene dukka opp i starten av februar. Det er så kjekt når ting byrjar å vakne til liv. Eg har nokre få grupper med snøklokker og krokus som gir stor glede, i tillegg til fleire ulike sortar botaniske tulipanar og narcisser.

Dei første frøa av grønnsaker og sommarblomar vart sådd i mars. Eg brukte vinteren på å flytte planterommet i kjellaren til vaskerommet, siden planterommet fekk ny funksjon som keramikkverkstad.

I starten av mars planta eg òg barrotsstauder i potter. Siden eg skulle etablere eit nytt, stort staudebed ville eg prøve meg på barrotsstauder sidan det er eit meir økonomisk alternativ enn å kjøpe større stauder i potte.

Det første eg gjorde ute i hagen i 2023 var å flytte ein sommarfuglbusk som sto heller trongt til i ein anna del av hagen, og planta to nye sommarfulgbuskar over den nye plattingen i staudehagen. Eg kjøpte dei nye buskane på salg på hausten, og heldigvis overlevde dei heile vinteren i nokså små potter.

I mars skar eg òg kantane på plenen i staudehagen. Å ha ein tydelig kant for å grense av områder som er frodige og rufsete er eit godt prinsipp.

I slutten av mars laga eg ein planteplan for kjøkkenhagen slik at eg fekk ein betre oversikt over kor mykje eg trengte å så, og om eg trengte å kjøpe fleire frø.

Dei fleste barrotstaudene eg sette i jord tidlegare i mars spirte i slutten av månaden.

Eg kjøpte omlag ein kubikk hagekompost frå den lokale gjenvinningsstasjonen, og la den mellom anna utover i skråninga mellom staudehagen og kjøkkenhagen. Først la eg ut eit lag med aviser for å avgrense ugrasvekst.

5. april gjekk eg i gong med etablering av nytt staudebed over muren langs innkjørsla. Det er her alle barrotsstaudene skal på plass.

Bedet er omlag 13 meter langt, så det trengs ein del planter for å fylle det. Eg er usikker på om eg skal forlenge det langs heile muren etter kvart. Eg har ein del idèar for dette området av hagen, men meir om det i eit seinare innlegg.

Langs gjerdet over plattingen planta eg fem planter laurberhegg som etterkvart vil hjelpe på å hindre innsyn frå vegen som går på oversida av tomta.

I botnen av trappa ned frå verandaen laga eg ein platting av steinrestar frå bygging av murane til plattingen i staudehagen.

Det har vore ein stor kvisthaug i det søraustre hjørnet av tomta siden eg flytta hit, og denne våren gjekk eg i gong med å fjerne den.

Kjøkkenhagen sett frå loftet 23. april 2023

Staudehagen sett frå loftet 23. april 2023

Ulike sortar grønnkål og mangold veks til

29. april sette eg løk og direktesådde rødbetar, sukkererter og ringblom i kjøkkenhagen

4. mai planta eg ut barrotsstauder i det nye bedet. Plantene hadde stått i carporten for å hardast ei stund før eg planta dei ut.

Eg plasserte pottene utover i heile bedet før eg begynte å grave, for å få rett avstand mellom plantene. Eg hadde ikkje laga ein plan for kor eg ville ha kva planter, så eg flytta litt rundt på plantene før eg landa på plassering.

6. mai sette eg poteter og sådde gulrot, pastinakk, diverse sommarblomar og bondebønner i kjøkkenhagen.

Eg tar bilder av frøposane der eg sår, slik er det lettare å huske kva eg har sådd kor

I midten av mai begynte eg å utvide det øvre bedet i staudehagen

Eg flytta litt stauder frå andre deler av staudehagen der det hadde blitt litt trongt, delte nokre planter og planta eit par nye eg hadde kjøpt.

Det er praktisk med ein carport der fara for at det vert for kaldt er mindre enn under åpen himmel. Eg brukar å sette ut alle plantene eg har sådd for å venne dei til utelivet eit par veker før 17.mai. Det same gjer eg for georginene som eg normalt set i jord inne i slutten av mars/starten av april. Dersom det er meldt kaldare enn 5 grader brukar eg å flytte alt inn i kjellaren igjen, og så ut att når fara for frost er over.

Blomstring i hagen i slutten av mai – her ser du geum (muligens sorten Mai Tai). Under mørk lilla tulipanar og Clematis montana ‘Rubens’.

Asparges midt i biletet og poteter til venstre

I denne plantekassen er det bladbete, gul løk, luftløk og fenikkel. I pottene og pallekarmen i bakkant er det diverse urter.

Eit lite glimt frå vestsida av huset 26. mai, der det tidlegare stod ei stor edelgran.

Nydelig valmue eg sådde for nokre år sidan

Eit prosjekt eg er veldig nøgd med frå 2023 er kastanjegjerdet eg sette opp i tomtegrensa i aust.

Gjerdet leiar blikket nedover mot ein del av hagen der det har vore ein stor kvisthaug. Området er ikkje brukt til noko, og er nokså utilgjengeleg. Eg har ein idé om at det skal byggjast eit drivhus der nede ein gong, og er nøgd med at gjerdet er med på å binde den delen av hagen meir saman med kjøkkenhagen ovanfor.

Fargetemaet i pottene på verandaen dette året var mørk oransje, lilla, vinraudt og nesten svart.

Kjøkkenhagen og kastanjegjerdet sett frå verandaen.

Langs kastanjegjerdet etablerte eg eit nytt blomsterbed. Her står det georginer, kyss meg over gjerdet, kongslys og raud kvann.

1. juli og staudene i det nye bedet er i god vekst, og eg held på å slå bakken i skråninga.

Nydelig rosa blomar på svarthyll ´Black Lace´

Bileta under viser glimt frå den frodige augusthagen. Eg syns hagen er på sitt finaste i august og september.

Frå staudehagen på muren, med purpursolhatt, oktoberbergknapp, Liatris spicata (dei lilla spira) og Heliopsis ´Burning Hearts´.

Dette er ein av mine favorittar av cosmos/pyntekorg – ´Apricotta´

Artisjokken eg sådde frå frø i 2022 overvintra og vart flotte planter dette året òg.

Syrinhortensia ein seinsommarkveld med nydeleg lys.

Masse bønner på buen i kjøkkenhagen 14. september. Til høgre står ein kjempeverbena som har sjølvsådd seg i hagen.

17. september planta eg to nye epletre i frukthagen. Frå før har eg eit tre av sorten Discovery. No planta eg eitt Aroma og eitt Nanna. I dette området fekk eg hjelp til å fjerne ei forvokst buskfuru litt tidlegare i september.

Kvisthaugen eg prøver å bli kvitt vart fort forvandla til flis i denne svært effektive flismaskina eg leigde meg nokre timar 18. september.

Eg starta med å ta opp georgineknollane frå potter og bed 19. oktober.

I starten av desember kom det masse tung snø, og eg måtte for første gong ut i hagen og riste snø av buskar og tre.

Og der var hageåret 2023 omme. Dette året var på eit vis eit slags pauseår der eg ikkje hadde like mange store prosjekt slik eg har hatt dei tidlegare åra. Det blir spennande å sjå kva 2024 vil bringe!