Er det vår no?

Hagen er i ferd med å vakne til liv, og eg har masse planar for kva som skal skje denne sesongen, og drømmer om korleis hagen ser ut om fire månader. April har ikkje vore heilt venleg med mange kalde dagar og snø når eg har hatt lyst til å begynne på diverse prosjekt. Må minne meg sjølv på at poenget med hagen er like mykje prosessen som resultatet, og at det smakar ekstra godt med noko ein har venta på.

Eg starta med forkultivering litt seinare enn i fjor, med den første sådden 14.mars. Prøver meg på vintersådd for første gong, og har tre sortar cosmos, korgblom og prydgulerot ståande ute i minidrivhus (godteriboksar og drueboksar). Elles sår eg i romtemperatur og flyttar plantene etter spiring til kjellaren der temperaturen ligg på omlag 15 grader, der eg har plantelys. Plantebordet står ved eit stort vindu, så dei får godt med dagslys òg.

Ute er resultatet av løkplantinga eg gjorde i haust i ferd med å komme til syne. Det første som blomstra av dei nye løkane var villtulipanen Tulipa turckestanica, og så snøstjernene. Ventar spent på at dei andre skal dukke opp og sette farge på beda.

Har sett i gong med eit prosjekt med fleire bed for sommarblomar og grønnsaker i skråningen over kjøkkenhagen, men det fortener ein eigen post når det er kome litt lenger. Under er eit undervegsbilde der du ser to nedklipte rhododendron som skal gravast opp.

Håpar du vil følge med på hageåret 2021 i lag med meg!