Kjøkkenhagen 2020

Det første som kom i jorda i kjøkkenhagen var jordbærplanter eg hadde i ein pallekarm. Desse sette eg langs kanten i fleire av plantekassane. I midten av mai sådde eg rødbetar og salatløk direkte. Hadde mange småplanter til forkultivering i planterommet i kjellaren som vart planta ut i slutten av mai.

Utplanting av småplanter av sukkererter, blomkarse, zinnia, solsikker og ringblom.
I kassen i midten er det òg sett rødløk.

Grønnål, svartkål, prydgulerot, ringblom, jordbær og rødløk.

To graskar og ei squashplante. I bakkant av dette bedet er det ein kant fletta av kvist under etablering, difor stikk det stokkar opp.

12.juni er plantene på god veg til å bli større.

Og berre 8 dagar seinare, 20.juni, ser det slik ut.

Hadde ein fotorunde i hagen 8.juli, og då var det blitt svært frodig og grønt. Bildene under viser at det meste trives godt.

Her har den nye hagebenken kome på plass. Det er flott å sitte her og kikke på hagen med fjorden i bakkant.

Salatløk, mangold, rosenkål og rødbetar på rader, med tre ringblomplanter i forkant, og sukkererter i bakkant.

Neste bilderunde er frå 26.juli, og det vert stadig grønare.

Til høgre i bildet er det ei einsleg spisskålplante. Dei to andre vart ete opp av sniglane, og denne gjekk dessverre den vegen til slutt den òg.

Squashplanta nede til høgre tok seg etter kvart opp etter ein sein start, men leverte berre nokre få frukter.

Det er veldig fint med blomar i kjøkkenhagen, men trur eg skal prioritere litt færre til neste år.

Her ser ein gulrøtter i kassen til venstre. Det vart ein fin liten haust av desse, men her var sniglane òg på ferde og åt opp omlag halvdelen av plantene. Eg registrerte ikkje gulrotfloger på plantene, og lurer på om det stemmer at det går betre med gulrøtter i kassar enn på bakken. Har høyrt at gulrotflogene ikkje flyr så høgt over bakken.

Mangolden trivdes godt, og eg er svært nøgd med den. Den kan brukast til mykje, og det er kjekt at ein kan hauste dei ytste blada og at den så veks vidare. Desse plantene står framleis i slutten av desember.

Bildene viser det ikkje, men sneglane har oppdaga at her er det mykje godt, og det går særleg utover dei ulike kålartane, særleg rosenkål, knutekål og spisskål, samt graskar og squash som står i bedet under syrinhortensiaen.

Bildene under er tatt 17.august, og viser ei fargerik blomstring i hagen mot slutten av sesongen.